بايعناك يابو فلان ، مو بالورق والله
احنا كَلوب بالصندوك حطينا
ظمايرنا الجت يابو فلان
ما جابتنا رجلينا
طلعنا من الصبح حفاي
رغم كل الخطر رغم الخوف جينا
سمموا حتى الماي
نشرب ( سفن) ظلينا
العلينا اليوم سويناه
لو تدري يعمي شلون سوينا
وصلنا المركز امدافع
ضربنا السرة وطبينا
عرفونا احنا وياك
راسا عرتوا بينا
فتشنا القائمة بساع
شخطة على الرقم حطينا
بايعناك يابو فلان
كلش زين سوينا
" والكطع النفس وياك
وين تريد ودينا "
مكروهين من ذولاك
العمايم زعلت علينا
شفنا هواي حجيّات .. حجيّات منتهيات
ولا وحدة (سمينا)
اجن ينتخبن الخمسات
ماسمعن حجينا
شفنا اثنين شيوعيات
متحجبات خافن من ملالينا
شفنا شناوة لابس قاط
يمكن همة مطينا
شفنا اصبيحة تمشي وياه
كلنا انزرب بينا
شفنا نويرة مرة غراب
اجت تجسس علينا
شفنا خنيجر ينظم الناس
ويدقق باسامينا
شفنا خضير ابن عناد
جاي يبيع لوزينا
شفنا عبيس السكران
يطوطح هد علينا
لعيونك اتحملناه
شتّم كل اهالينا
طلع قامته وصاح
سود وقائعنا ،حمر مواضينا
ومناك اجت هوسات ،
فلتنا ومادروا بينا
طفرنا بساع يابو فلان
(ركضاً في الدرابينا) تقرا بالفصيح
ولمّن صارت نعالات
لبيوت الاهل طبينا
شفت شلون يابو فلان
شفت اشصار بينا
بعد لتكول انتخابات
زوج الينتخب بينا
* * *
بايعناك يابو فلان مو بالورق والله
احنا كَلوب بالصندوك حطينا
لاتجينا لاتجينا لاتجينا
الاهبي بصحنك فاصبحينا
جان كلت بوجه الابيض
اضحى التنائي بديلا عن تدانينا
هلي وزماطهم صولاغ
يرد مكسور، جف اليلاوينا
ياعلينا ياعلينا ... ياعلينا
* * *
ياناس لولا علي
جا هلك جدنا عمر
صيروا انتوا اكراد لعلي
ونصير كلدان لعمر
تحصيل حاصل اذن
خوتنا صارت قهر
والله من طيبتي
سميت حبي رؤى
اتمنى تقبل رؤى
وتصير مثلي فكَر
تجيب جنطتها وتجي
ونتزوج براس الشهر
ويصير عدنا ولد
يشبه صديقي جبر
يم امي اسمه ، علي
ويم امها اسمه ، عمر
يا علينا ياعلينا ياعلينا.
ليست هناك تعليقات:
إرسال تعليق